एमाले अध्यक्ष केपी शर्मा ओली र ‘तेस्रो धार’का नेताहरूबीच १० बुँदे सहमति कार्यान्वयनको मोडालिटी र समय तालिका बनाउने सहमति भएको छ । ओली निवास बालकोटमा भएको असन्तुष्ट पक्षका स्थायी कमिटीका सदस्यसँग भएको सहमतिमा मंगलबार स्थायी कमिटीको बैठक बसेर मोडालिटी तय गर्ने सहमति भएको हो ।
१० बुँदे सहमतिका कार्यान्वयनका लागि मंगलबार स्थायी कमिटीको बैठक बस्नेछ,’ एमाले सचिव योगेश भट्टराईले भने, ‘स्थायी कमिटीले १० बुँदे कार्यान्वयनको मोडालिटी र त्यो कार्यान्वयनको तिथिमिति पनि तय गर्ने छ । स्थायी कमिटीको बैठक लगत्तै केन्द्रीय कमिटीको बैठक पनि बस्ने छ ।’
छलफलमा २०७५ जेठ २ गते एमालेको जुनजुन नेताहरुको जिम्मेवारी जेजे त्यसैअनुसार अघि बढ्न अध्यक्ष ओली सहमत भएको भट्टराईले बताए ।
‘आजको छलफलको निष्कर्ष भनेको १० बुँदेले २०७५ जेठ २ गते कायम रहेको नेकपा एमालेको केन्द्र, प्रदेश, जिल्ला, निर्वाचन क्षेत्र, नगर/गाउँ, वडा र टोलसम्म कमिटी क्रियाशील हुन्छन्’ भट्टराईले भने, ‘२०७५ जेठ २ गते जुन–जुन नेताहरुको जिम्मेवारी जे थियो त्यो जिम्मेवारी यथावत रहन्छ । ’
भट्टराईले मंगलबार बस्ने स्थायी कमिटीको बैठकले नै अलग पार्टी दर्ता प्रक्रियामा रहेका नेताहरुलाई फर्किनसमेत आह्वान पनि गर्ने बताए ।
